Æ, var þetta gallað?

Betra er að þegja þunnu hljóði

og þykjast vera saklaus eins og barn.

Því annars minnkar allur þeirra gróði

og eftir stendur bara svikið skarn.

Kínversku leikfangasamtökin sögð hafa vitað að leikföngin hafi verið gölluð

En ekki hvað?

Forgangurinn finnst mér ljós,

það flestir ættu að sjá.

Ofurlaunin, eðaldrós,

og svo kagga þrjá.

 

Risahús í höfuðstað,

Harrods, Top Shop næst.

Mikið ræða má um það

hvort mörk svo komi glæst.

Roy Keane: Eiginkonurnar ráða of miklu

Hvar eru neytendasamtökin?

Vörusvikum víst er hart

að verjast ef þú dópar.

Til lögreglu þú leitar vart,

því líklega við þannig kvart

þér hent er inn í holið svart;

það hafa prófað glópar.

Hringdi í lögregluna til að kvarta yfir kókaíninu

Fært í stílinn

Höggið virtist helst til fast,

hélt hann áfram þó.

Síðar fékk hann soldið kast

er sá hann engann skó.

 

Blóðugur til baka rann,

á bifhjólinu fló.

Heppinn var, því fótinn fann

og fékk því aftur skó.

 

Á sjúkrahús hann sentist þá,

þeir saman létu hró.

Og riddarinn nú rogginn má

reima báða skó.

Tók ekki eftir því að fóturinn var horfinn

Einkennin

Útvíkkaðir augnasteinar,

öndun hröð og svitakóf,

hláturskrampi, hjartað veinar;

hrellir þetta kaffiþjóf.

Á sjúkrahús eftir of mikið af espresso

En má hann það í úthverfunum?

Miðbæjarrotturnar má ekki styggja,

móðgun og ofbeldi getur það valdið.

Skoðanafrelsi og forræðishyggja

fer ekki saman, þú borgar því gjaldið.

Ekki reita David Pratt til reiði

TMNT

Nærföt? eða Ninjaklæði?

Náunginn sig varði!

Sár varð byssubófinn skæði,

blóð dró kutinn harði.

Fjórir særðir eftir skotbardaga í Ósló

"Það fossar blóð..."

Ofstækistrúin hún ofbýður mér

og endalaust nær mig að hryggja.

Kúgun og ofbeldi kristallast hér

og kolbrengluð forræðishyggja.

Egypsk stúlka lést af völdum kynfæraskurðar

Fjárhagsvandi sveitarfélaga leystur

Egilsstaða er það svinna;

öðrum sveitum brátt það kenna;

ef þú skyldir eiga að vinna

upp þá launin gjarnan brenna.

 

Brunavarða byrji hrota;

brenni hús í veðri ströngu;

á eldinn þeir nú eiga að nota

eigið vatn, og jafnvel slöngu.

Slökkviliðsmenn á Egilsstöðum segja upp starfi

Uppfinning íslenskra neytenda

Síríuslengjur í lakkrís við vöfðum

og lakkrísrör settum í kókið.

Ánægju mikla við af þessu höfðum

þó ekki það væri nú flókið.

 

Sælgætisbarónar sáu þar gróða

og saman loks pökkuðu þessu.

Nú útlensku fólki þeir upp á það bjóða

íslensku trítlarnir hressu.

Íslenska nammi-útrásin hafin