Áhrif kulda

Ljósmynd af hópnekt er laus við allt skop,

af list þeirri hef ég þó gaman:

Með athygli’á jökulsins eilífa hop,

ýmislegt fleira skrapp saman.

Hundruð nakinna manneskja á svissneskum jökli

Gamla lífið minnir á sig

Í sýndarheimum sorgin fer,

þar sælulíf má spinna.

En greyin aðeins geta hér

gengið örna sinna.

Annað líf í sýndarveruleika

Enn eitt prófið

Sykurinn ég sæki mér,

en segi ekki frá því.

Ef að þvagpróf í ég fer,

ekki mun ég ná því.

Greina ekki rétt frá sykurneyslunni

Eitt land, ein tunga, ein okun...

Áðurfyrr gróðinn til faglærðra fór

og fitan á réttan stað settist.

Þeir moka nú peningapúkanna flór

og passa að mistök ei fréttist.

Þegja yfir mistökum í apótekum

Umsnúningur

Konurnar víst koma senn

á krárnar sig að staupa,

en snyrtilegir mjúkir menn

maskarana kaupa.

Karlmenn eyða meira í snyrtivörur en áður

Offors...

Frónarreisu fresta bar;

farar varð ei auðið;

þegar Lars af þrótti skar

þumalputta á brauðið.

Ostaskeri eyðilagði Íslandsför

Að hengja...

Í matarverðið margir spá,

og mæla nótt og dag.

Ef það lækkar ýmsir sjá

aukinn þjóðarhag.

Þeir VaSKinn felldu’og vildu fá

á verðlag nýjan brag.

En hagnaðinn tók höndin blá

og hagstjórnin fékk slag.

Nú kannanirnar kanna á,

og koma þeim í lag.

Viðskiptaráðherra felur Neytendastofu að kanna rafrænar verðkannanir

Góður dagur

Ef að hitinn eitthvað rís;

ekki þarf að klæðast flís;

sé þá ekki voðinn vís,

vissulega það ég kýs,

að sleppa vinnu, slappa af og sleikja ís.

Gæði íss meiri í ár en í fyrra - tveimur íssölum lokað í ár

Æ, var þetta gallað?

Betra er að þegja þunnu hljóði

og þykjast vera saklaus eins og barn.

Því annars minnkar allur þeirra gróði

og eftir stendur bara svikið skarn.

Kínversku leikfangasamtökin sögð hafa vitað að leikföngin hafi verið gölluð

En ekki hvað?

Forgangurinn finnst mér ljós,

það flestir ættu að sjá.

Ofurlaunin, eðaldrós,

og svo kagga þrjá.

 

Risahús í höfuðstað,

Harrods, Top Shop næst.

Mikið ræða má um það

hvort mörk svo komi glæst.

Roy Keane: Eiginkonurnar ráða of miklu