Ríkisleyndarmálin eru mörg

Leyndarmál er lýðræðinu æðra

ef leynist það á allra hæstu stöðum.

Það gætir okkar allra minnstu bræðra,

ekki þarf að fletta um það blöðum.

Bush hafnar óskum Bandaríkjaþings um yfirheyrslur yfir fyrrum aðstoðarmönnum

Olíulaus framtíð

Þegar að lindirnar þorna og tæmast

mun þriðja heimsstyrjöldin byrja,

og lýðræðishugsjón til dauða mun dæmast,

er djöflakór byrjar að kyrja:

 

Við orkuna verðum að eiga hér trygga,

og enginn skal standa í vegi.

Já, eflaust það gera mun einhverja hrygga,

en einskis er verður sá tregi.

 

Yfirráð þýða, á olíusvæðum,

að okkur mun heimurinn lúta.

Flest önnur ríki til hlýðni við hræðum

er höggvum við sum þeirra í búta.

http://video.google.com/videoplay?docid=8677389869548020370&q=oil+smoke+and+mirrors

 

Olíuverð heldur áfram að hækka

Er þetta nú ekki að verða komið gott?

Ef þeir sem mótmæla fá sínu fram

þá fæst engum verkum hér þokað.

Að endingu landið sem Ingólfur nam

allt verður friðað og lokað.

Mótmælaaðgerðir fyrirhugaðar við Hellisheiðarvirkjun og við Þjórsá

Plássleysi í fangelsum

Forsetinn vill ekki föngunum sleppa,

og finnst mér það svo sem í lagi.

Vandinn er hins vegar húsnæðiskreppa;

sem hænur í búi þeir fangelsin teppa;

og Sarkozy ætti nú að því að keppa

að úr þessum vandkvæðum dragi.

Sarkozy neitar að náða fanga á Bastilludaginn

Til hamingju Mýrarmenn

Út fór Mýrin, ei sem skraut,

ísinn dýra þar hún braut.

Ansi skýran heiður hlaut;

hennar lýrikkur ég naut.

Sigurinn á Karlovy Vary kvikmyndahátíðinni kom Baltasar Kormáki á óvart

Skothelt kvótakerfi?

Fækkar störfum, færiböndin stoppa.

Er í kvótakerfinu

kannski einhver gloppa?

Staðbundin áhrif vegna þorskaflasamdráttar fimm milljarðar á Vesturlandi

Hóstaviðbragð

Bensínfótur brást við hart

er braust út hóstinn snarpur.

Hornið næsta hefti fart,

húsið braut víst garpur.

Ók á hús nágrannans

Slysamark

Brjálaðist allt þegar Bjarni hann skaut

og boltinn flaug rakleitt í markið.

Marbletti íþróttamennskan þá hlaut

og meiðyrða- byrjar nú –harkið.

Bjarni: Mér þykir þetta ofboðslega leiðinlegt

Það er erfitt að undirbúa sig fyrir kvikmyndahlutverk

Innlifun leiddi til ofbeldisverka,

örg varð hún Britney við ljósmyndasnápinn.

Reidd var til höfuðhöggs regnhlífin sterka,

reyndi þar á hve hann þykkan bar skrápinn.

 

Kvikmyndahlutverkið kom henni í bobba,

karakter var hún í liðlangan daginn.

Af þessu vill hún þó ekki sig grobba,

önnur fékk hlutverkið, þrátt fyrir slaginn.

Ofbeldi Britney vegna kvikmyndahlutverks