10. Saga Akraness: Það var búið að jarða hana áður en Páll gagnrýndi

Af hverju fær Páll Baldvin allan heiðurinn af því að "jarða" "Sögu Akraness" þegar Harpa Hreinsdóttir hafði gert það ítarlega nokkru á undan honum?

Þetta er klúður ársins

Endimörk

Knörr þú átt, kostafley,

keikur þú horfir úr stafni.

Framtíð æ felst í því

fundvísum treystir þú hrafni.

Áfram svo, endalaust,

á meðan heldur þú nafni.

Lifir þú lífið af

láttu það enda á safni.

 

Hugur þig hálfa leið

hefur úr óminnisflaumi.

Áræðnin upp þér nær

yfir þó bulli og kraumi.

Allir fá af því nóg

eilíft að standa í glaumi.

Lifir þú lífið af

láttu það enda í draumi.

 

Fordild oft flekar hug

fjandann við aldrey þó grátum.

Mistökin manna þig,

mótlætistrú ey við játum.

Hugrekki, hamingja,

halda þér yfirleitt kátum.

Lifir þú lífið af

láttu það enda í gátum.

 

Lífið er lostadans,

leika þar mildi og harka.

Frelsi er fárra völ,

flestir í gegn um það slarka.

Lengst þú nærð líki þér

löngum af krafti að þjarka.

Lifir þú lífið af

láttu það enda án marka.

Að aflokinni atkvæðagreiðslu

Með óbragð í munni um æseif ég kaus

og atkvæði gildu fékk skilað,

en umræðum landans mér hugur við hraus,

á heiftina af einurð var spilað.

Í skútunni þjóðar hver skrúfa er laus;

er skrítið að eitthvað sé bilað?

Varar Íslendinga við

Íslensk umræðuhefð

Ég viðurkenni á mig allskyns brot

af ósamþykktum hugsunum,

og ef að ég í þrætum kemst í þrot

þríf ég mig úr buxunum.

 

Á netinu ég naga ófá bök

og nafnleysið þá hvetur mig,

en IP-talan ein er mín svo stök -

það oft í klemmu setur mig.

 

Litlum fuglum legg ég eyrun við

og Leitis-Gróu þekki ég.

Andstæðingum fáum gef ég frið

og framsóknarmenn hrekki ég.

 

Mér himinbláa höndin vísar leið

að háleitasta markinu:

að fláræðisins gata verði greið

með grófu hreðjasparkinu.

Harka í ESB-umræðum Framsóknar

Er ekki íslenska krónan lögeyrir á Íslandi?

Ef þeir borga þetta í íslenskum krónum - skuld íslensks fyrirtækis við annað íslenskt fyrirtæki - fyrir hvers konar samningsbrot yrðu þeir þá kærðir, og hver væri refsingin?

Geta þeir ekki bara depónerað greiðslunni og farið svo í mál?

Fær ekki nægan gjaldeyri

Ranghalarófa

Landið þau erfðu af hagsýnum hjónum

sem höfðu það ræktað svo vel,

og hlunnindin góðu frá heiðum og sjónum

hirtu nú Leggur og Skel.

 

En vinnan var erfið til viðhalds þeim gæðum

og væntingum gróðæris til,

svo námskeið þau sóttu í fjármagnsins fræðum

og fjárhættu- lærðu þá -spil.

 

„Vini“ þau fundu með vitneskju næga

um vélráð og arðrán og plott

sem veittu þeim ráðgjöf um verkamenn þæga

og veðlán og peningaþvott.

 

Og Leggur og Skel töldu leiðina greiða

og lífsgæðakapphlaupið hófst,

en landið á spottprís tókst „vinum“ að veiða

og vefurinn flæktist og ófst.

 

Þau dönsuðu kónga í ranghalarófu

rambandi á hengiflugsbrún

en ótýndir „vinirnir“ óðar upp grófu

hvert einkavætt peningatún.

 

Svo stóðust ey loforðin, leiktjöldin hrundu

og Leggur og Skel fengu sjokk.

Af „hógværum“ lánum á herðum nú stundu:

„Helvítis Fokkings Fokk!“.

 

Ef holan þig gleypir þú hættir að moka,

á himininn stillir þú mið,

og leggur þá frá þér hvern peningapoka

sem pressar þig niður á við.

 

En Leggur og Skel þetta lærðu víst ekki

og líklegast moka þau enn

og vefja sig fastar í framtíðarhlekki

sem fjármagnsins- seldu þeim -menn.

Skilanefndarstarfið svo lítið að nægur tími er að sinna almennum störfum?

Nú hefur manni skilist á allri umræðu um launagreiðslur til skilanefndarmanna að þetta væri rúmlega fullt starf og fólk jafnvel svæfi ekki af álagi.

Svo er bara nægur tími til að sinna almennum lögmannsstörfum í leiðinni! Eða er þetta rangur misskilningur hjá mér?

Verjandi situr í eftirlitsnefnd

Á að grafa flokkinn á miðjum fundi?

„Þingflokksfundur VG hefst í dag kl. 12 á hádegi. Fundarhlé verður gert vegna jarðarfarar um kl. 14.30 og áætlað er að fundi verði framhaldið um kl. 17 síðdegis í dag...“

„Frásögn um margboðað morð“

má hér í fréttinni sjá.

Vinstri-Græn varnaðarorð

varla til flokksmanna ná.

Óþreyja og pirringur að aukast hjá vinstri grænum

Peningagaldur - þetta ætti að vera kennt í grunnskólum...

... og vera til prófs til að komast í framhaldsnám: http://www.vald.org/greinar/101116.html

Þetta kristallar líka átökin í Vinstri-Grænum núna. Steingrímur er á fullu að verja þetta kerfi, á meðan Lilja vill komast undan því. Og svo er Lilja kölluð lýðskrumari af sérvöldum álitsgjöfum fjölmiðlanna - sem nota bene er stýrt af banksterum.

Spurning varðandi fyrirtækjastjórnendakönnunina

Sambærileg könnun sem gerð var fyrir samtök atvinnulífsins (sjá hér: http://www.sa.is/frettir/almennar/nr/5023/) virðist vera nokkurn vegin jafn dökk og hjá okkur „neytendum“. Ég var þó aðeins að skoða bjartsýnistölurnar í þeirri könnun, og eftirfarandi er ekki alveg að dansa í mínum kolli:

„Þeir örfáu stjórnendur sem telja aðstæður góðar starfa í sjávarútvegi og í iðnaði en í öðrum greinum telur enginn að aðstæður séu góðar.“ ... „ Í upphaflegu úrtaki voru 418 stærstu fyrirtæki landsins (miðað við heildarlaun) og var svarhlutfall var 44%“

1% af 44% af 418 reiknast mér til að séu 1,8392 fyrirtæki. Ætli þetta séu þá ekki stjórnendur tveggja fyrirtækja sem eru bjartsýnir, og þar af annar þeirra í sjávarútvegi og hinn í iðnaði?

Einnig: eru stjórnendur þeirra 56% fyrirtækja sem engin svör berast frá á þessari sömu línu, og má þá reikna með að öll sjávarútvegsfyrirtæki svari eins og þetta eina sem svaraði jákvætt, eða eru 99% þeirra ekki eins bjartsýn og þessi eini?

Íslendingar svartsýnir í árslok